ଭୁବନେଶ୍ବର: ରାଜଧାନୀରେ ଗଡିବ ମେଟ୍ରୋ ଟ୍ରେନ। ଆଜି ଉତ୍କଳ ଦିବସରେ ଏହି ଘୋଷଣା କରିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ। ଏହି ମେଟ୍ରୋ ଟ୍ରେନ ଖୋର୍ଦ୍ଧା, ଭୁବନେଶ୍ବର, ପୁରୀ ଏବଂ କଟକ ସହରକୁ ଯୋଡିବ। ଆଜି ସକାଳେ ମୁଖ୍ୟ ଶାସନ ସଚିବ, 5ଟି ସଚିବ ପ୍ରମୁଖ ବରିଷ୍ଠ ଅଧିକାରୀମାନେ ଭୁବନେଶ୍ବର ଏୟାରପୋର୍ଟରୁ କଟକ ତ୍ରିଶୁଳିଆ ପର୍ଯ୍ୟନ୍ତ ତଦାରଖ କରିଥିଲେ।
ଏହାପରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏହି ମେଟ୍ରୋ ପ୍ରକଳ୍ପର ତଥ୍ୟ ହସ୍ତଗତ କରିବା ପରେ ତାହାକୁ ଅନୁମୋଦନ କରିଥିଲେ। ସେ କହିଥିଲେ ଯେ, ଉତ୍କଳ ଦିବସ ଉପଲକ୍ଷେ ଏହା ରାଜ୍ୟବାସୀଙ୍କୁ ଏକ ଭେଟି। ସେ ଆହୁରି କହିଥିଲେ ଯେ, ଏହି ମହତ୍ବପୂର୍ଣ୍ଣ ଅବସରରେ ମୁଁ କଟକ, ଭୁବନେଶ୍ୱର, ପୁରୀ ଏବଂ ଖୋର୍ଦ୍ଧାକୁ ସଂଯୋଗ କରୁଥିବା ମେଟ୍ରୋ ଟ୍ରେନ୍ ପ୍ରକଳ୍ପ ଘୋଷଣା କରି ଖୁସି ଅଛି।
ବିଭିନ୍ନ ହିତାଧିକାରୀ ଏବଂ ଫିଜିବିଲିଟ ରିପୋର୍ଟ ଦ୍ୱାରା ଏହି ପ୍ରକଳ୍ପ ଅଧ୍ୟୟନ କରାଯାଇଛି। ପ୍ରଥମ ପର୍ଯ୍ୟାୟରେ ଆମେ କଟକ ନିକଟସ୍ଥ ତ୍ରିସୁଲିଆଠାରୁ ଭୁବନେଶ୍ୱରର ବିଜୁ ପଟ୍ଟନାୟକ ଅନ୍ତର୍ଜାତୀୟ ବିମାନବନ୍ଦର ପର୍ଯ୍ୟନ୍ତ ମେଟ୍ରୋ ଟ୍ରଙ୍କ୍ ମାର୍ଗ ତିଆରି କରିବୁ। ଏହି ମାର୍ଗଟି ନନ୍ଦନକାନନ, ପଟିଆ, ବାଣୀବିହାର ଏବଂ ଭୁବନେଶ୍ବର ଷ୍ଟେସନ୍ ଇତ୍ୟାଦି ସ୍ଥାନ ସହିତ ସଂଯୋଗ ହେବ।
ଯେହେତୁ ସୁବାଷ ବୋଷ ସେତୁ ନିକଟରୁ ଏହି ପ୍ରକଳ୍ପ ଆରମ୍ଭ ହେଉଛି, ଏହା କଟକ ଭୁବନେଶ୍ବର ଯାତ୍ରୀମାନେ ଗୁରୁତ୍ୱପୂର୍ଣ୍ଣ ସ୍ଥାନଗୁଡିକୁ ସୁବିଧାରେ ଯିବା ପାଇଁ ସକ୍ଷମ ହେବେ। ପରବର୍ତ୍ତୀ ପର୍ଯ୍ୟାୟରେ ଏହି ମେଟ୍ରୋ ଖୋର୍ଦ୍ଧା ଏବଂ ପୁରୀ ପର୍ଯ୍ୟନ୍ତ ସଂପ୍ରସାରିତ ହେବ।
ଯୁଦ୍ଧକାଳୀନ ଭିତ୍ତିରେ ଡିଆରପି ସଂପୂର୍ଣ୍ଣ କରିବାକୁ ମୁଁ ଗୃହ ଓ ନଗର ଉନ୍ନୟନ ବିଭାଗକୁ କହିଛି। ଏହି ପ୍ରକଳ୍ପ ମୁଖ୍ୟତଃ ଉଚ୍ଚ କରିଡର ଉପରେ ଆଧାରିତ ହେବ ଏବଂ ଏହା ସମ୍ପୂର୍ଣ୍ଣ ରୂପେ ରାଜ୍ୟ ସରକାରଙ୍କ ଆର୍ଥିକ ଅନୁଦାନରେ ନିର୍ମାଣ ହେବ।
ଆମେ ସବୁବେଳେ ଲୋକଙ୍କ ଜୀବନରେ ଉନ୍ନତି ଆଣିବାକୁ ଚେଷ୍ଟା କରିଛୁ। ଆଜି ଏହି ନୂତନ ପ୍ରକଳ୍ପର ଘୋଷଣା ସହିତ, ଆମେ ରାଜ୍ୟବାସୀଙ୍କୁ ମେଟ୍ରୋ ସିଟି ସ୍ତରୀୟ ସେବା ଯୋଗାଇବା ପାଇଁ ଚେଷ୍ଠା କରିଛୁ। ଏକ ନୂତନ ଓଡିଶା ଆଡକୁ ଆଉ ଏକ ପଦକ୍ଷେପ ଆମେ ନେଉଛୁ। ଏହି ପ୍ରକଳ୍ପ ଅତ୍ୟାଧୁନିକ ସୁବିଧାଗୁଡ଼ିକ ସହ ବିଶ୍ୱ ସ୍ତରୀୟ, ପରିବେଶ ଅନୁକୂଳ ସହରାଞ୍ଚଳ ପରିବହନ ପ୍ରଦାନ କରିବ।
ଏହି ପ୍ରକଳ୍ପ ରାଜ୍ୟ ଅର୍ଥନୀତିକୁ ମଧ୍ୟ ବେଶ୍ ଉତ୍ସାହିତ କରିବ ଏବଂ ଭୁବନେଶ୍ୱର, କଟକ, ପୁରୀ ଏବଂ ଖୋର୍ଦ୍ଧାକୁ ଅନ୍ତର୍ଭୁକ୍ତ କରୁଥିବା ଆମର ସହର କ୍ଲଷ୍ଟର ସମ୍ପ୍ରସାରଣକୁ ମଧ୍ୟ ତ୍ୱରାନ୍ୱିତ କରିବ। ଏକ ଆଧୁନିକ ଏବଂ ଯୋଜନାବଦ୍ଧ ସହର କ୍ଲଷ୍ଟର ଦ୍ବାରା ପୁଞ୍ଜି ବିନିଯୋଗ, ବାଣିଜ୍ୟ ଏବଂ ପର୍ଯ୍ୟଟନକୁ ଆକର୍ଷିତ କରିବ। ଏହା 5ଟି ର ନୀତି ବ୍ୟବହାର କରି କାର୍ଯ୍ୟକାରୀ ହୋଇଥିବା ଏକ ପ୍ରକୃତ ପରିବର୍ତ୍ତନଶୀଳ ପ୍ରକଳ୍ପ ହେବ ବୋଲି ନବୀନ କହିଛନ୍ତି।
