ସୀତାରାମ ଅଗ୍ରୱାଲ
ବାଣପୁର: ଖୋର୍ଦ୍ଧା ଜିଲ୍ଲା ବାଣପୁର କାରାଗାରରେ କାର୍ଯ୍ୟରତ ଉପ ସହକାରୀ କାରାପାଳ ଜି. ଭିକାରି ପ୍ରଧାନ (୫୯)ଙ୍କ ଆକସ୍ମିକ ମୃତ୍ୟୁ ହୋଇଛି। ସୂଚନା ମୁତାବକ ଗତକାଲି ରାତିରେ କାର୍ଯ୍ୟ ସାରି ନିଜ ସରକାରୀ ବାସଭବନରେ ବିଶ୍ରାମ ନେଉଥିବା ବେଳେ ହଠାତ ଭିକାରି ଛାତିରେ ଯନ୍ତ୍ରଣା ଅନୁଭବ କରିଥିଲେ। ଜେଲ କର୍ମଚାରୀମାନେ ତାଙ୍କୁ ବାଣପୁର ମେଡିକାଲ କୁ ନେଇଥିବା ବେଳେ ତାଙ୍କ ଅବସ୍ଥା ଗୁରୁତର ହୋଇଥିଲା। ସଙ୍ଗେସଙ୍ଗେ ତାଙ୍କୁ ଭୁବନେଶ୍ୱର କ୍ୟାପିଟାଲ ହସ୍ପିଟାଲ ରେଫର କରାଯାଇଥିବା ବେଳେ ବାଟରେ ତାଙ୍କର ମୃତ୍ୟୁ ହୋଇଯାଇଥିଲା।
ତେବେ ଏହା ହୃଦଘାତ ଲାଗି ହୋଇଥାଇପାରେ ବୋଲି ଜେଲ ସୁପରିଟେଣ୍ଡେଣ୍ଟ ଜଗତ ବିହାରୀ ରାଉତରାୟ ଅନୁମାନ କରୁଥିବା ବେଳେ ଶବ ବ୍ୟବଚ୍ଛେଦ ରିପୋର୍ଟ ଆସିଲାପରେ ମୃତ୍ୟୁର କାରଣ ଜଣାପଡିବ ବୋଲି କହିଛନ୍ତି।
ବାଣପୁର ଥାନାରେ ଏ ନେଇ ୨/୨୩ ରେ ଏକ ଅପମୃତ୍ୟୁ ମାମଲା ରୁଜୁ ହୋଇଛି। ତେବେ ଭିକାରିଙ୍କ ମୃତ୍ୟୁରେ ଜେଲ ଏବଂ ଥାନା କର୍ମଚାରୀ ମାନେ ଶୋକ ପ୍ରକାଶ କରିଛନ୍ତି। ତାଙ୍କର ଗୋଟିଏ ପୁତ୍ର ଥିବାର ଜଣାପଡିଛି।
ସୂଚନା ଥାଉକି ଶ୍ରୀ ପ୍ରଧାନ ପାଖପାଖି ଏକ ବର୍ଷ ତଳେ ବାଣପୁର କାରାଗାରରେ ଉପ ସହକାରୀ କାରାପାଳ ଭାବେ ଯୋଗଦେଇଥିଲେ।
