ନୂଆଦିଲ୍ଲୀ: ଭାରତୀୟ କ୍ରିକେଟ୍ କଣ୍ଟ୍ରୋଲ ବୋର୍ଡ (BCCI) ସାଉଦି ଆରବର ଏକ ମେଗା ପ୍ରକଳ୍ପକୁ ନଷ୍ଟ କରିବା ପାଇଁ ପଦକ୍ଷେପ ନେଇଛି। ପ୍ରକୃତରେ ECB (ଇଂଲଣ୍ଡ ଏବଂ ୱେଲ୍ସ କ୍ରିକେଟ୍ ବୋର୍ଡ) ସହିତ BCCI ହାତ ମିଳାଇଛି ଏବଂ ଏହି ମାମଲା ସାଉଦି ଟି-୨୦ ଲିଗ୍ ସହିତ ଜଡିତ, ଯେଉଁଥିରେ ୩,୦୦୦ କୋଟି ଟଙ୍କାରୁ ଅଧିକ ନିବେଶ ହେବାର ଆକଳନ କରାଯାଉଛି। ଏବେ ଖବର ଆସିଛି ଯେ, ଭାରତ ଏବଂ ଇଂଲଣ୍ଡର କ୍ରିକେଟ୍ ବୋର୍ଡ ସାଉଦି ଟି-୨୦ ଲିଗ୍ କୁ ସମର୍ଥନ କରିବେ ନାହିଁ।
ବ୍ରିଟିଶ ଖବରକାଗଜ ଦି ଗାର୍ଡିଆନ ଅନୁଯାୟୀ, ଲର୍ଡସରେ ଖେଳାଯାଇଥିବା ବିଶ୍ୱ ଟେଷ୍ଟ ଚାମ୍ପିଅନସିପ୍ ଫାଇନାଲ୍ ମ୍ୟାଚ୍ ସମୟରେ ଅନୁଷ୍ଠିତ ବୈଠକ ପରେ, BCCI ଏବଂ ECB ସାଉଦି ଟି-୨୦ ଲିଗ୍ କୁ ବିରୋଧ କରିବାକୁ ରାଜି ହୋଇଛନ୍ତି। ଉଭୟ ଦେଶର କ୍ରିକେଟ୍ ବୋର୍ଡ ମଧ୍ୟରେ ଏକମତ ହୋଇଛି ଯେ, ସେମାନେ ଏହି ନୂତନ ଲିଗ୍ ରେ ଖେଳିବା ପାଇଁ ସେମାନଙ୍କ ଖେଳାଳିମାନଙ୍କୁ NOC (ନୋ ଅବଜେକ୍ସନ୍ ସାର୍ଟିଫିକେଟ୍) ପ୍ରଦାନ କରିବେ ନାହିଁ। ଏହା ସହିତ, ଉଭୟ ବୋର୍ଡ ସାଉଦି ଟି-୨୦ ଲିଗ୍ କୁ ସମର୍ଥନ ନ କରିବା ପାଇଁ ମଧ୍ୟ ଚାପ ପକାଇଛନ୍ତି।
ଏହି ରିପୋର୍ଟ ଅନୁଯାୟୀ, କ୍ରିକେଟ୍ ଅଷ୍ଟ୍ରେଲିଆ (ସିଏ) ସାଉଦି ନିବେଶକଙ୍କ ସହ ହାତ ମିଳାଇ ଲାଭ ରୋଜଗାର କରିବା ଉପରେ ଧ୍ୟାନ ଦେଉଛି। ସିଏର ସମର୍ଥନ ସାଉଦି ଟି-୨୦ ଲିଗ୍ ଉପରେ ବିଶେଷ ପ୍ରଭାବ ପକାଇ ନପାରେ କାରଣ ଆଇପିଏଲ୍ର ବ୍ରାଣ୍ଡ ମୂଲ୍ୟ ୧୨ ବିଲିୟନ ଆମେରିକୀୟ ଡଲାରରୁ ଅଧିକ, ଯେତେବେଳେ ଇସିବି ‘ଦି ହଣ୍ଡ୍ରେଡ୍ ଲିଗ୍’ରେ ଦଳଗୁଡ଼ିକର ୪୯ ପ୍ରତିଶତ ଅଂଶଧନ ବିକ୍ରି କରି ପ୍ରାୟ ୭୦୦ ମିଲିୟନ ଆମେରିକୀୟ ଡଲାରର ବମ୍ପର ଲାଭ ମଧ୍ୟ କରିବାକୁ ଯାଉଛି।
କ୍ରିକେଟ୍ ଦକ୍ଷିଣ ଆଫ୍ରିକା (ସିଏସଏ) ମଧ୍ୟ ଲାଭରେ ଚାଲିଛି, ଯାହା ୩ ବର୍ଷ ପୂର୍ବେ ଆଇପିଏଲ୍ ଦଳଗୁଡ଼ିକୁ ଫ୍ରାଞ୍ଚାଇଜିର ମାଲିକାନା ଦେଇଥିଲା। ଏହି ଚୁକ୍ତିରୁ ସିଏସଏ ପ୍ରାୟ ୧୩୬ ମିଲିୟନ ଆମେରିକୀୟ ଡଲାର ଲାଭ କରିବ ବୋଲି କୁହାଯାଉଥିଲା। ଯଦି ରିପୋର୍ଟଗୁଡ଼ିକୁ ବିଶ୍ୱାସ କରାଯାଏ, ତେବେ ସାଉଦି ଆରବର ନିବେଶକମାନେ ସାଉଦି ଟି-୨୦ ଲିଗ୍ରେ ପ୍ରାୟ ୩,୪୪୨ କୋଟି ଟଙ୍କା ନିବେଶ କରିବାକୁ ଯାଉଛନ୍ତି।