ନୂଆଦିଲ୍ଲୀ: କେନ୍ଦ୍ର ସ୍ୱରାଷ୍ଟ୍ର ତଥା ସମବାୟ ମନ୍ତ୍ରୀ ଅମିତ ଶାହ ନୂଆଦିଲ୍ଲୀରେ ସେହି ଅଧିକାରୀମାନଙ୍କୁ ଭେଟିଛନ୍ତି ଯେଉଁମାନେ ନିକଟରେ ହୋଇଥିବା ନକ୍ସଲ ବିରୋଧୀ ଅପରେସନରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥିଲେ ଏବଂ ଏହି ଅପରେସନଗୁଡ଼ିକର ଐତିହାସିକ ସଫଳତା ପାଇଁ ସେମାନଙ୍କୁ ଅଭିନନ୍ଦନ ଜଣାଇଥିଲେ। ସେ କହିଥିଲେ ଯେ, ମୋଦୀ ସରକାର ଭାରତକୁ ନକ୍ସଲବାଦର ବିପଦରୁ ମୁକ୍ତ କରିବା ପାଇଁ ପ୍ରତିଶ୍ରୁତିବଦ୍ଧ।
ଏକ୍ସ ରେ ଏକ ପୋଷ୍ଟରେ କେନ୍ଦ୍ର ସ୍ୱରାଷ୍ଟ୍ର ମନ୍ତ୍ରୀ କହିଛନ୍ତି, “ନିକଟରେ ହୋଇଥିବା ନକ୍ସଲ ବିରୋଧୀ ଅପରେସନରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥିବା ଅଧିକାରୀମାନଙ୍କୁ ଭେଟିଥିଲି ଏବଂ ଏହି ଅପରେସନର ଐତିହାସିକ ସଫଳତା ପାଇଁ ସେମାନଙ୍କୁ ଅଭିନନ୍ଦନ ଜଣାଇଥିଲି। ମୁଁ ସେହି ସାହସୀ ଯବାନମାନଙ୍କୁ ଭେଟିବାକୁ ଆଗ୍ରହୀ, ଯେଉଁମାନେ ନିଜ ସାହସ ଦ୍ୱାରା ଏହି ଅଭିଯାନକୁ ସଫଳ କରିଥିଲେ ଏବଂ ଖୁବ୍ ଶୀଘ୍ର ସେମାନଙ୍କୁ ଭେଟିବା ପାଇଁ ଛତିଶଗଡ଼ ଗସ୍ତ କରିବି। ମୋଦୀ ସରକାର ଭାରତକୁ ନକ୍ସାଲବାଦର ବିପଦରୁ ମୁକ୍ତ କରିବା ପାଇଁ ପ୍ରତିଶ୍ରୁତିବଦ୍ଧ।’’
ଏଠାରେ ଉଲ୍ଲେଖନୀୟ ଯେ କେନ୍ଦ୍ର ସ୍ୱରାଷ୍ଟ୍ର ତଥା ସମବାୟ ମନ୍ତ୍ରୀଙ୍କ ମାର୍ଗଦର୍ଶନରେ ସୁରକ୍ଷା ବାହିନୀ ଛତିଶଗଡ଼ରେ ନକ୍ସଲ ବିରୋଧୀ ଅପରେସନ ଚଳାଇଛନ୍ତି। ଏହି ପ୍ରୟାସର ଅଂଶବିଶେଷ ସ୍ୱରୂପ, ଛତିଶଗଡ଼ ପୋଲିସ ଦ୍ୱାରା (ନାରାୟଣପୁର, ଦାନ୍ତେୱାଡ଼ା, କୋଣ୍ଡଗାଓଁ ଏବଂ ବିଜାପୁର ଜିଲ୍ଲାର ଡିଆରଜି ୟୁନିଟ୍ ସମେତ) ଅବୁଝମାଡର ଆଭ୍ୟନ୍ତରୀଣ ଅଞ୍ଚଳରେ ୧୮.୦୫.୨୦୨୫ ରୁ ୨୧.୦୫.୨୦୨୫ ପର୍ଯ୍ୟନ୍ତ ଏକ ଅପରେସନ କରାଯାଇଥିଲା। ୨୧.୦୫.୨୦୨୫ ରେ, ବୋଟର ଗାଁର ଜଙ୍ଗଲରେ ଏକ ଏନକାଉଣ୍ଟର ଫଳସ୍ୱରୂପ ସିପିଆଇ (ମାଓବାଦୀ) ସାଧାରଣ ସମ୍ପାଦକ ଏବଂ ପଲିଟ୍ ବ୍ୟୁରୋର ସଦସ୍ୟ ବାସବରାଜୁ ଓରଫ ଗଗାନ୍ନାଙ୍କ ସମେତ ୨୭ ଜଣ ନକ୍ସଲଙ୍କ ମୃତ୍ୟୁ ଘଟିଥିଲା, ଏବଂ ବିପୁଳ ପରିମାଣର ଅସ୍ତ୍ରଶସ୍ତ୍ର ଏବଂ ଗୁଳିଗୋଳା ଉଦ୍ଧାର କରାଯାଇଥିଲା।
ଏହି ଅପରେସନରେ ସାମିଲ ଥିବା ଅଧିକାରୀମାନଙ୍କ ମଧ୍ୟରେ ଛତିଶଗଡ଼ର ପୁଲିସ ମହାନିର୍ଦ୍ଦେଶକ ଅରୁଣ ଦେବ ଗୌତମ, ଅତିରିକ୍ତ ପୁଲିସ ମହାନିର୍ଦ୍ଦେଶକ (ଆଣ୍ଟି-ନକ୍ସାଲ ଅପରେସନ/ଏସ୍.ଆଇ.ବି./ଏସ୍.ଟି.ଏଫ୍.) ବିବେକାନନ୍ଦ, ପୁଲିସ ମହାନିରୀକ୍ଷକ (ବସ୍ତର ରେଞ୍ଜ) ସୁନ୍ଦରରାଜ, ପୁଲିସ ଅଧୀକ୍ଷକ (ନାରାୟଣପୁର) ପ୍ରଭାତ କୁମାର, ପୁଲିସ ଅଧୀକ୍ଷକ (ବିଜାପୁର) ଜିତେନ୍ଦ୍ର ଯାଦବ ଏବଂ ପୁଲିସ ଅଧୀକ୍ଷକ (ନକ୍ସଲ ମୁକ୍ତ ବସ୍ତର ଜିଲ୍ଲା) ଶଲଭ ସିଂହଙ୍କୁ କେନ୍ଦ୍ର ସ୍ୱରାଷ୍ଟ୍ର ମନ୍ତ୍ରୀ ଅମିତ ଶାହ ସମ୍ମାନିତ କରିଥିଲେ। ଏହି କାର୍ଯ୍ୟକ୍ରମରେ ଛତିଶଗଡ଼ ମୁଖ୍ୟମନ୍ତ୍ରୀ ବିଷ୍ଣୁ ଦେବ ସାଇ, ଉପମୁଖ୍ୟମନ୍ତ୍ରୀ ଶ୍ରୀ ବିଜୟ କୁମାର ଶର୍ମା, କେନ୍ଦ୍ର ଗୃହ ସଚିବ ଗୋବିନ୍ଦ ମୋହନ, ଗୁଇନ୍ଦା ନିର୍ଦ୍ଦେଶକ ତପନ ଡେକା ଏବଂ ଅନ୍ୟ ବରିଷ୍ଠ ଅଧିକାରୀମାନେ ଯୋଗ ଦେଇଥିଲେ।