ନୂଆଦିଲ୍ଲୀ: ବେସାମରିକ ବିମାନ ଚଳାଚଳ ମନ୍ତ୍ରୀ ରାମ ମୋହନ ନାଇଡୁ, ରାଷ୍ଟ୍ରମନ୍ତ୍ରୀ ମୁରଲୀଧର ମୋହୋଲ, ମନ୍ତ୍ରଣାଳୟର ସଚିବ ସମୀର କୁମାର ସିହ୍ନା ଏବଂ ବରିଷ୍ଠ ଅଧିକାରୀମାନଙ୍କ ସହିତ ଆଜି ନୂଆଦିଲ୍ଲୀର ଉଡାନ ଭବନରେ ଏକ ସାମ୍ବାଦିକ ସମ୍ମିଳନୀକୁ ସମ୍ବୋଧିତ କରିଛନ୍ତି। ଏହି ସମ୍ମିଳନୀରେ ଏୟାର ଇଣ୍ଡିଆ ବିମାନ ଏଆଇ 171ର ଦୁଃଖଦ ଦୁର୍ଘଟଣା ବିଷୟରେ ବିସ୍ତୃତ ଭାବରେ ସୂଚନା ପ୍ରଦାନ କରାଯାଇଥିଲା। ଭାରତ ସରକାରଙ୍କ ତୁରନ୍ତ ପ୍ରତିକ୍ରିୟା, ଜାରି ରହିଥିବା ତଦନ୍ତର ସ୍ଥିତି ଏବଂ ବିମାନ ସୁରକ୍ଷାକୁ ସୁଦୃଢ଼ କରିବା ପାଇଁ ଭବିଷ୍ୟତରେ ସଂସ୍କାର ସମ୍ପର୍କରେ ସବିଶେଷ ସୂଚନା ଦିଆଯାଇଥିଲା।
ପ୍ରାଣ ହରାଇଥିବା ଲୋକଙ୍କ ସ୍ମୃତିରେ ଗୋଟିଏ ମିନିଟ୍ ନୀରବ ପ୍ରାର୍ଥନା ସହିତ ସାମ୍ବାଦିକ ସମ୍ମିଳନୀ ଆରମ୍ଭ ହୋଇଥିଲା।
ସୂଚନାଯୋଗ୍ୟ, 12 ଜୁନ୍ 2025ରେ, ଅହମ୍ମଦାବାଦ ଏବଂ ଗାଟୱିକ୍ ବିମାନବନ୍ଦର (ଲଣ୍ଡନ) ମଧ୍ୟରେ ଚଳାଚଳ କରୁଥିବା ଏକ ବୋଇଂ 787-8 ଡ୍ରିମଲାଇନର ବିମାନ ତଥା ଏୟାର ଇଣ୍ଡିଆର ଫ୍ଲାଇଟ୍ ସଂଖ୍ୟା ଏଆଇ171 ଉଡ଼ାଣ ଆରମ୍ଭ କରିବାର ଗୋଟିଏ ମିନିଟ୍ ମଧ୍ୟରେ ଦୁର୍ଘଟଣାଗ୍ରସ୍ତ ହୋଇଥିଲା। ଏହି ଦୁର୍ଘଟଣା ଅହମ୍ମଦାବାଦର ଜନବହୁଳ ମେଘାଣୀ ନଗର ଅଞ୍ଚଳରେ ଘଟିଥିଲା। ବିମାନଟି 242 ଜଣ ବ୍ୟକ୍ତିଙ୍କୁ ନେଇ ଯାଉଥିଲା। ଏଥିରେ 230 ଜଣ ଯାତ୍ରୀ, 2 ଜଣ ପାଇଲଟ୍ ଏବଂ 10 ଜଣ ବିମାନ କର୍ମଚାରୀ ଥିଲେ।
ମୃତକଙ୍କ ମଧ୍ୟରେ ବିମାନ ଯାତ୍ରୀ ଏବଂ ଅହମ୍ମଦାବାଦର ମେଘାଣୀ ନଗରର ଯୁବ ଡାକ୍ତରୀ ଛାତ୍ର ଅଛନ୍ତି। ସେମାନଙ୍କ ଅକାଳ ବିୟୋଗକୁ କେବଳ ସେମାନଙ୍କ ପରିବାର ପାଇଁ ନୁହେଁ ବରଂ ଦେଶର ଭବିଷ୍ୟତ ପାଇଁ ମଧ୍ୟ ଏକ ଗଭୀର କ୍ଷତି ଭାବରେ ବର୍ଣ୍ଣନା କରାଯାଇଛି।
ଘଟଣା ପରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ତୁରନ୍ତ ଦୁର୍ଘଟଣାସ୍ଥଳ ଏବଂ ଅହମ୍ମଦାବାଦ ସିଭିଲ୍ ହସ୍ପିଟାଲ ପରିଦର୍ଶନ କରିଥିଲେ। ସେଠାରେ ସେ ଆହତ ଏବଂ ଶୋକସନ୍ତପ୍ତ ପରିବାରବର୍ଗଙ୍କ ସହିତ ଆଲୋଚନା କରିଥିଲେ ଏବଂ ଉଦ୍ଧାର ଓ ସହାୟତା କାର୍ଯ୍ୟ ସମ୍ପର୍କରେ ସମୀକ୍ଷା କରିଥିଲେ। ପରବର୍ତ୍ତୀ କାର୍ଯ୍ୟ ନିର୍ଦ୍ଦେଶ ଦେବା ପାଇଁ ସେ ବିମାନବନ୍ଦରରେ ଏକ ଉଚ୍ଚସ୍ତରୀୟ ବୈଠକର ଅଧ୍ୟକ୍ଷତା ମଧ୍ୟ କରିଥିଲେ।
ଗୃହମନ୍ତ୍ରୀ ଅମିତ ଶାହ ଘଟଣା ପରେ ତୁରନ୍ତ ଘଟଣାସ୍ଥଳରେ ପହଞ୍ଚି ସ୍ଥିତି ସମୀକ୍ଷା କରିଥିଲେ ଏବଂ ପୀଡିତ ପରିବାରକୁ ସମସ୍ତ ଆବଶ୍ୟକ ସହାୟତା ଯୋଗାଇବା ପାଇଁ କେନ୍ଦ୍ରୀୟ ଏଜେନ୍ସିଗୁଡ଼ିକୁ ନିର୍ଦ୍ଦେଶ ଦେଇଥିଲେ।
ଦୁର୍ଘଟଣା ପରେ ତୁରନ୍ତ ବେସାମରିକ ବିମାନ ଚଳାଚଳ ମନ୍ତ୍ରୀ ରାମ ମୋହନ ନାଇଡୁ, ରାଷ୍ଟ୍ରମନ୍ତ୍ରୀ ମୁରଲୀଧର ମୋହୋଲଙ୍କ ସହିତ ଘଟଣାସ୍ଥଳ ପରିଦର୍ଶନ କରିଥିଲେ। ସେମାନେ ପୀଡିତଙ୍କ ପରିବାର ଏବଂ ଜରୁରୀକାଳୀନ ସେବାରେ ଜଡିତ ଡାକ୍ତରୀ କର୍ମଚାରୀଙ୍କୁ ଭେଟିଥିଲେ। ପରେ ପରିସ୍ଥିତି ଏବଂ ପ୍ରତିକ୍ରିୟା ବ୍ୟବସ୍ଥା ସମୀକ୍ଷା କରିବା ପାଇଁ କେନ୍ଦ୍ର ଏବଂ ରାଜ୍ୟ ଅଧିକାରୀଙ୍କ ସହିତ ବୈଠକ କରିଥିଲେ।
ବେସାମରିକ ବିମାନ ଚଳାଚଳ ମନ୍ତ୍ରୀ ଏହି ଦୁଃଖଦ ଜୀବନହାନୀ ପାଇଁ ଗଭୀର ଦୁଃଖ ପ୍ରକାଶ କରି ସ୍ୱୀକାର କରିଛନ୍ତି ଯେ ଏହି ଘଟଣା ସମଗ୍ର ଦେଶକୁ ଦୋହଲାଇ ଦେଇଛି। ସମସ୍ତ ପ୍ରଭାବିତ ପରିବାର, ବିଶେଷକରି ଯେଉଁମାନେ ଦୁର୍ଘଟଣାରେ ଯୁବ ଛାତ୍ରଙ୍କୁ ହରାଇଛନ୍ତି ସେମାନଙ୍କ ପ୍ରତି ସେ ସମବେଦନା ଜଣାଇଛନ୍ତି। ଦୁର୍ଘଟଣାରେ ନିଜର ପିତାମାତାଙ୍କୁ ହରାଇବାର ବ୍ୟକ୍ତିଗତ ଅଭିଜ୍ଞତା ଉପରେ ଆଲୋକପାତ କରି କେନ୍ଦ୍ର ମନ୍ତ୍ରୀ କହିଛନ୍ତି ଯେ ସେ ଶୋକ କରୁଥିବା ଲୋକଙ୍କ ଯନ୍ତ୍ରଣାକୁ ହୃଦୟଙ୍ଗମ କରିପାରୁଛନ୍ତି।
ଘଟଣା ଘଟିବାର କିଛି ଘଣ୍ଟା ମଧ୍ୟରେ ବେସାମରିକ ବିମାନ ଚଳାଚଳ ମନ୍ତ୍ରଣାଳୟ ଏହାର ମୁଖ୍ୟାଳୟରେ ଏକ 24×7 ନିୟନ୍ତ୍ରଣ କକ୍ଷ ସକ୍ରିୟ କରିଥିଲା, ଯେଉଁଥିରେ ଡିଜିସିଏ, ବିସିଏଏସ, ସିଆଇଏସଏଫ ଏବଂ ଏଏଆଇର କର୍ମଚାରୀମାନେ ସମନ୍ୱିତ ପ୍ରୟାସ କରିଥିଲେ। ଜାତୀୟ ଗଣମାଧ୍ୟମ କେନ୍ଦ୍ରରେ ଏକ ସମାନ୍ତରାଳ ଗଣମାଧ୍ୟମ ନିୟନ୍ତ୍ରଣ କକ୍ଷ ମଧ୍ୟ ସ୍ଥାପନ କରାଯାଇଥିଲା।
ପରିବାରଗୁଡ଼ିକୁ ସହାୟତା କରିବା ପାଇଁ, ଅନେକ ହେଲ୍ପଲାଇନ୍ କାର୍ଯ୍ୟକ୍ଷମ କରାଯାଇଛି : ଅହମ୍ମଦାବାଦ ବିମାନବନ୍ଦର ଜରୁରୀକାଳୀନ ହେଲ୍ପଲାଇନ୍: 9974111327ରେ ସୂଚନା ମିଳିପାରୁଛି। ବେସାମରିକ ବିମାନ ଚଳାଚଳ ମନ୍ତ୍ରଣାଳୟର ନିୟନ୍ତ୍ରଣ କକ୍ଷ: 011-24610843/9650391859 ଏବଂ ଏୟାର ଇଣ୍ଡିଆ ଯାତ୍ରୀ ହେଲ୍ପଲାଇନ୍: 1800-5691-444 ଖୋଲାଯାଇଥିଲା। ବେସାମରିକ ବିମାନ ଚଳାଚଳ ମନ୍ତ୍ରଣାଳୟ, ଡିଜିସିଏ, ବିସିଏଏସ, ଏଏଆଇବି ଏବଂ ଏଏଆଇର ବରିଷ୍ଠ ଅଧିକାରୀମାନେ ଉଦ୍ଧାର କାର୍ଯ୍ୟ ଏବଂ ସାହାଯ୍ୟ ତଦାରଖ କରିବା ପାଇଁ ତୁରନ୍ତ ଘଟଣାସ୍ଥଳରେ ପହଞ୍ଚିଥିଲେ।
ପ୍ରଭାବିତ ପରିବାରକୁ ବ୍ୟାପକ ସହାୟତା ପ୍ରଦାନ କରିବା ପାଇଁ ସରକାର ଏୟାର ଇଣ୍ଡିଆ ପରିଚାଳନା କର୍ତ୍ତୃପକ୍ଷକୁ ସ୍ପଷ୍ଟ ନିର୍ଦ୍ଦେଶ ଦେଇଛନ୍ତି। ପଦକ୍ଷେପଗୁଡ଼ିକ ମଧ୍ୟରେ କ୍ଷତିପୂରଣ ତୁରନ୍ତ ବଣ୍ଟନ, ପରିଜନଙ୍କୁ ଲଜିଷ୍ଟିକ୍ ଏବଂ ଭାବଗତ ସମର୍ଥନ କରିବାକୁ କୁହାଯାଇଛି। ପ୍ରଭାବିତ ପରିବାରକୁ ଭେଟି ସହାୟତା କରିବା ପାଇଁ ଏୟାର ଇଣ୍ଡିଆର ବରିଷ୍ଠ ଅଧିକାରୀମାନଙ୍କୁ ନିୟୋଜିତ କରିବାକୁ ନିର୍ଦ୍ଦେଶ ଦିଆଯାଇଛି। ବ୍ରିଟିଶ ନାଗରିକ ଏବଂ ସେମାନଙ୍କ ପରିବାର ପାଇଁ ଲଣ୍ଡନର ଗଟୱିକ୍ରେ ଏକ ଉତ୍ସର୍ଗୀକୃତ ସହାୟତା ପ୍ରକୋଷ୍ଠ ପ୍ରତିଷ୍ଠା, ଆହତଙ୍କ ପାଇଁ ଡକ୍ୟୁମେଣ୍ଟେସନ୍, ଯାତ୍ରା ବ୍ୟବସ୍ଥା ଏବଂ ହସ୍ପିଟାଲ ସମନ୍ୱୟରେ ସହାୟତା କରିବାକୁ କୁହାଯାଇଛି।
କେନ୍ଦ୍ର ମନ୍ତ୍ରୀ ଶ୍ରୀ ନାଇଡ଼ୁ ଗୁରୁତ୍ୱାରୋପ କରିଥିଲେ ଯେ ଏହି ଘଟଣାକୁ କେବଳ ଏକ ବୈଷୟିକ ତଦନ୍ତ ଭାବରେ ନୁହେଁ ବରଂ ଏକ ମାନବିକ ପ୍ରାଥମିକତା ଭାବରେ ବିଚାର କରାଯିବା ଉଚିତ। ଶୋକସନ୍ତପ୍ତ ପରିବାରକୁ ସମସ୍ତ ପ୍ରକାରର ସହାୟତା ଯୋଗାଇ ଦିଆଯିବା ଆବଶ୍ୟକ।
ବିମାନ ଦୁର୍ଘଟଣା ତଦନ୍ତ ବ୍ୟୁରୋ (ଏଏଆଇବି) ସେହି ଦିନ ଦୁର୍ଘଟଣାର ଏକ ଆନୁଷ୍ଠାନିକ ତଦନ୍ତ ଆରମ୍ଭ କରିଥିଲା। ଏଏଆଇବି ର ମହାନିର୍ଦ୍ଦେଶକଙ୍କ ନେତୃତ୍ୱରେ ଏକ ପାଞ୍ଚ ଜଣିଆ ଦଳକୁ ତୁରନ୍ତ ପଠାଯାଇଥିଲା ଏବଂ ପରେ ଫୋରେନସିକ୍ ଓ ଚିକିତ୍ସା ବିଶେଷଜ୍ଞମାନଙ୍କୁ ଏଥିରେ ସାମିଲ କରାଯାଇଥିଲା।
ଜୁନ୍ 13 ତାରିଖ ସନ୍ଧ୍ୟା ପ୍ରାୟ 5ଟାରେ ବିମାନର ବ୍ଲାକ୍ ବାକ୍ସ ଉଦ୍ଧାର ସହିତ ଏକ ଗୁରୁତ୍ୱପୂର୍ଣ୍ଣ ସଫଳତା ହାସଲ କରାଯାଇଥିଲା। ଏହା ଡିକୋଡିଂ ପ୍ରକ୍ରିୟା ଉଡ଼ାଣର ଶେଷ ମୁହୂର୍ତ୍ତ ବିଷୟରେ ଗୁରୁତ୍ୱପୂର୍ଣ୍ଣ ଅନ୍ତର୍ଦୃଷ୍ଟି ପ୍ରଦାନ କରିବ ବୋଲି ଆଶା କରାଯାଉଛି।
ସ୍ୱାଧୀନ ଏବଂ ବିସ୍ତୃତ ତଦନ୍ତ କରିବା ପାଇଁ କେନ୍ଦ୍ର ଗୃହ ସଚିବଙ୍କ ଅଧ୍ୟକ୍ଷତାରେ ଏକ ଉଚ୍ଚସ୍ତରୀୟ କମିଟି ଗଠନ କରାଯାଇଛି। କମିଟିରେ ବେସାମରିକ ବିମାନ ଚଳାଚଳ ମନ୍ତ୍ରଣାଳୟ, ସ୍ୱରାଷ୍ଟ୍ର ମନ୍ତ୍ରଣାଳୟ, ଗୁଜରାଟ ସରକାର, ଡିଜିସିଏ, ବିସିଏଏସ୍, ଭାରତୀୟ ବାୟୁସେନା, ଗୁଇନ୍ଦା ବ୍ୟୁରୋ, ରାଜ୍ୟ ବିପର୍ଯ୍ୟୟ ପ୍ରତିକ୍ରିୟା ପ୍ରାଧିକରଣର ଅଧିକାରୀ ତଥା ଜାତୀୟ ଏବଂ ରାଜ୍ୟସ୍ତରୀୟ ଫୋରେନସିକ୍ ବିଶେଷଜ୍ଞଙ୍କୁ ସାମିଲ କରାଯାଇଛି।
ତଦନ୍ତ କମିଟିର ମୁଖ୍ୟ ଉଦ୍ଦେଶ୍ୟ ହେଉଛି, କାର୍ଯ୍ୟକଳାପ, କାର୍ଯ୍ୟକ୍ଷମ ଏବଂ ନିୟାମକ ଦୃଷ୍ଟିକୋଣରୁ ଘଟଣାଟି ପରୀକ୍ଷା କରିବା। ଯେକୌଣସି ବ୍ୟବସ୍ଥାଗତ କିମ୍ବା ସାଂସ୍ଥାଗତିକ ବ୍ୟବଧାନ ଚିହ୍ନଟ କରିବା ସହିତ ତିନ ମାସ ମଧ୍ୟରେ ଏକ ସମନ୍ୱିତ ରିପୋର୍ଟ ଦାଖଲ କରିବା। ଏହି କମିଟି ପ୍ରମାଣପତ୍ର ପ୍ରଦାନ ବ୍ୟବସ୍ଥା, ଜରୁରୀକାଳୀନ ପ୍ରତିକ୍ରିୟା ପ୍ରୋଟୋକଲ୍, ବିମାନ କର୍ମଚାରୀଙ୍କ ତାଲିମ ଏବଂ ବିମାନ ଟ୍ରାଫିକ୍ ପରିଚାଳନା ସିଷ୍ଟମ୍ ସମେତ ବିମାନ ସୁରକ୍ଷାକୁ ସୁଦୃଢ଼ କରିବା ପାଇଁ ଦୀର୍ଘକାଳୀନ ସଂସ୍କାର ସୁପାରିସ କରିବ।
ମନ୍ତ୍ରୀ ସୂଚନା ଦେଇଛନ୍ତି ଯେ ଏଏଆଇବି ତଦନ୍ତ ବୈଷୟିକ ଦିଗଗୁଡ଼ିକୁ ପରିଚାଳନା କରିବ, ଏହି ଉଚ୍ଚସ୍ତରୀୟ କମିଟି ଭବିଷ୍ୟତର ସୁରକ୍ଷା ପାଇଁ ଏକ ସାମଗ୍ରିକ, ନୀତି-ଆଧାରିତ ରୋଡମ୍ୟାପ୍ ପ୍ରଦାନ କରିବ। କମିଟି ସୋମବାର, ଜୁନ୍ 16ରେ ଏହାର କାର୍ଯ୍ୟପ୍ରକ୍ରିୟା ଆରମ୍ଭ କରିବ।
ଡିଜିସିଏ ଏୟାର ଇଣ୍ଡିଆକୁ ଜେନେକ୍ସ ଇଞ୍ଜିନ ସହିତ ସଜ୍ଜିତ ସମସ୍ତ ବୋଇଂ 787-8 ଏବଂ 787-9 ବିମାନର ତୁରନ୍ତ ଯାନ୍ତ୍ରିକ ଯାଞ୍ଚ କରିବାକୁ ନିର୍ଦ୍ଦେଶ ଦେଇଛି। ଭାରତୀୟ ବିମାନ ବାହକମାନଙ୍କ ମଧ୍ୟରେ ବର୍ତ୍ତମାନ ସେବାରେ ଥିବା 33ଟି ଡ୍ରିମଲାଇନର ମଧ୍ୟରୁ 8ଟି ଯାଞ୍ଚ ହୋଇସାରିଛି। ଅବଶିଷ୍ଟ ବିମାନର ଜରୁରୀକାଳୀନ ଯାଞ୍ଚ କରାଯାଉଛି। ଡିଜିସିଏ ଭାରତରେ କାର୍ଯ୍ୟ କରୁଥିବା ସମସ୍ତ ୱାଇଡ-ବଡି ବିମାନ ପାଇଁ ରକ୍ଷଣାବେକ୍ଷଣ ପ୍ରୋଟୋକଲ ଏବଂ ବିମାନ ଯୋଗ୍ୟତା ପ୍ରକ୍ରିୟାର ନିରୀକ୍ଷଣକୁ ମଧ୍ୟ ତ୍ୱରାନ୍ୱିତ କରିଛି।
ମନ୍ତ୍ରୀ ଶ୍ରୀ ନାଇଡ଼ୁ ବିମାନ ସୁରକ୍ଷାରେ ଭାରତର ବିଶ୍ୱସ୍ତରୀୟ ସ୍ଥିତିକୁ ଦୋହରାଇ ଉଲ୍ଲେଖ କରିଛନ୍ତି ଯେ ଆଇସିଏଓ ସମେତ ଅନ୍ତର୍ଜାତୀୟ ସଂଗଠନଗୁଡ଼ିକ ଭାରତର ବିମାନ ନିୟାମକ ପ୍ରଣାଳୀକୁ ନିରନ୍ତର ଭାବରେ ଦୃଢ଼ ଏବଂ ଅନୁପାଳନକାରୀ ଭାବରେ ମୂଲ୍ୟାଙ୍କନ କରିଛି । ସେ ସୁରକ୍ଷା ଏବଂ ସ୍ୱଚ୍ଛତାର ସର୍ବୋଚ୍ଚ ମାନଦଣ୍ଡ ସୁନିଶ୍ଚିତ କରିବା ପାଇଁ ସରକାରଙ୍କ ଅଟଳ ପ୍ରତିବଦ୍ଧତାକୁ ପୁନର୍ବାର ଦୋହରାଇଛନ୍ତି।
ମନ୍ତ୍ରଣାଳୟ ଜନସାଧାରଣ ଏବଂ ଗଣମାଧ୍ୟମକୁ ଅନୁମାନ କିମ୍ବା ଅପ୍ରତ୍ୟାଶିତ ଖବର ପ୍ରସାରଣ ଠାରୁ ନିବୃତ୍ତ ରହିବାକୁ ଅନୁରୋଧ କରିଛି। ତଦନ୍ତ ଅଗ୍ରଗତି ସହିତ ସମସ୍ତ ସରକାରୀ ନିଷ୍କର୍ଷକୁ ସମୟୋଚିତ ଏବଂ ସ୍ୱଚ୍ଛ ଭାବରେ ସେୟାର କରାଯିବ। ସରକାର ସତ୍ୟ ଉନ୍ମୋଚନ ଏବଂ ପ୍ରଭାବିତ ପରିବାରକୁ ନ୍ୟାୟ ପ୍ରଦାନ କରିବା ଉପରେ ଧ୍ୟାନ ଦେଉଛନ୍ତି ବୋଲି ମନ୍ତ୍ରୀ କହିଛନ୍ତି।