ନୂଆଦିଲ୍ଲୀ: କିଛି ଗଣମାଧ୍ୟମ ରିପୋର୍ଟରେ ଦାବି କରାଯାଉଥିଲା ଯେ, ଆଗାମୀ ଦିନରେ ମୋଦି ସରକାର ଜାତୀୟ ରାଜପଥ ବ୍ୟବହାର କରୁଥିବା ଦୁଇ ଚକିଆ ଯାନରୁ ମଧ୍ୟ ଟୋଲ୍ ଟିକସ ଆଦାୟ କରିବେ। ଏବେ ନୀତିନ ଗଡକରୀ ଏହା ଉପରେ ସ୍ପଷ୍ଟ କରିଛନ୍ତି।
କେନ୍ଦ୍ର ମନ୍ତ୍ରୀ ନୀତିନ ଗଡକରୀ କହିଛନ୍ତି, କିଛି ଗଣମାଧ୍ୟମ ସଂସ୍ଥା ଦୁଇ ଚକିଆ ଯାନ ଉପରେ ଟୋଲ୍ ଟିକସ ଲାଗୁ କରିବା ବିଷୟରେ ଭ୍ରାମକ ଖବର ପ୍ରସାରଣ କରୁଛନ୍ତି। ଏପରି କୌଣସି ନିଷ୍ପତ୍ତି ପ୍ରସ୍ତାବିତ ନୁହେଁ। ଦୁଇ ଚକିଆ ଯାନ ପାଇଁ ଟୋଲ୍ ଉପରେ ସମ୍ପୂର୍ଣ୍ଣ ଛାଡ଼ ଜାରି ରହିବ।
କ’ଣ ଦାବି କରାଯାଉଥିଲା?:
ଗଣମାଧ୍ୟମ ରିପୋର୍ଟରେ ଦାବି କରାଯାଉଥିଲା ଯେ, କେନ୍ଦ୍ର ସରକାର ଦୁଇଚକିଆ ଯାନ ଚାଳକଙ୍କ ପାଇଁ ଏକ ନିର୍ଦ୍ଦେଶ ଜାରି କରିଛନ୍ତି, ଯାହା ଅନୁଯାୟୀ ସେମାନଙ୍କୁ ୧୫ ଜୁଲାଇ, ୨୦୨୫ ଠାରୁ ଜାତୀୟ ରାଜପଥ ବ୍ୟବହାର କରିବା ପାଇଁ ଟୋଲ୍ ଟ୍ୟାକ୍ସ ଦେବାକୁ ପଡିବ। ରିପୋର୍ଟରେ ଏହା ମଧ୍ୟ କୁହାଯାଇଥିଲା ଯେ, ନୂତନ ନିୟମ ଅନୁଯାୟୀ, ଦୁଇଚକିଆ ଯାନଗୁଡ଼ିକୁ FASTag ମାଧ୍ୟମରେ ଟୋଲ୍ ଟ୍ୟାକ୍ସ ଦେବାକୁ ପଡିବ ଏବଂ ନିୟମ ଉଲ୍ଲଂଘନ କଲେ ଦୁଇ ହଜାର ଟଙ୍କା ଜରିମାନା ମଧ୍ୟ ଆଦାୟ କରାଯିବ। ତଥାପି ଏବେ କେନ୍ଦ୍ର ମନ୍ତ୍ରୀ ଏ ବିଷୟରେ ସ୍ପଷ୍ଟୀକରଣ ଦେଇଛନ୍ତି ଏବଂ ରିପୋର୍ଟଗୁଡ଼ିକୁ ଅସ୍ୱୀକାର କରାଯାଇଛି।
ଅଗଷ୍ଟ ୧୫ ରୁ ମାସିକ ପାସ୍:
ଉଲ୍ଲେଖ ଯୋଗ୍ୟ ଯେ, କେନ୍ଦ୍ର ସରକାର ନିକଟରେ ଚାଳକମାନଙ୍କୁ ଆଶ୍ୱସ୍ତି ଦେଇ ଏକ ବଡ଼ ଘୋଷଣା କରିଥିଲେ। ସରକାର ବାର୍ଷିକ ପାସ୍ ବିଷୟରେ ଘୋଷଣା କରିଥିଲେ। ଏହା ଅଧୀନରେ ଚାଳକମାନେ ୩୦୦୦ ଟଙ୍କା ମୂଲ୍ୟର ଏକ ଫାଷ୍ଟାଗ୍ ପାଇପାରିବେ, ଯାହା ସକ୍ରିୟ ହେବା ତାରିଖରୁ ଗୋଟିଏ ବର୍ଷ କିମ୍ବା ୨୦୦ ଟ୍ରିପ୍ ପାଇଁ ବୈଧ ହେବ। ଏହି ପାସ୍ ଅଗଷ୍ଟ ୧୫ ତାରିଖ ୨୦୦୫ ରୁ କାର୍ଯ୍ୟକାରୀ ହେବ।